På kjøkkenet på Rygjabø vgs er det full aktivitet. Ryfylke smak produserer tomatsaus som galne, oppildna av å ha selt mange glas av den nye, lokalproduserte sausen på Gladmat. - Det gjekk godt på Gladmaten, og no gledar me oss til å presentera produktet vårt på Tomatfestivalen, seier ein litt småstressa Leif Arild Steen medan han skrellar tomater som snart skal bli saus.


Full tomatkontroll: Ingvild S. Steen skrellar mildt varmebehandla tomater. Etter eit par minutt med damping går det som ein leik å skrella dei.

Fire arbeidarar er i sving på kjøkkenet. Kokk Frode Selvaag stikk ut kjernar frå tomater, Leif Arild og kona Ingvild skrellar, medan Heidi Frestad kjem inn gjennom døra, klar for ei ny arbeidsøkt. I dagane før Gladmat-festivalen gjekk det på nattesøvnen laus, og gjengen har travle dagar føre seg før Tomatfestivalen. - Me kokar berre ei gryte i dag, så slepp me å vera ferdige så jysla seint i kveld, er den beroligande meldinga frå Leif Arild.

Tomatene som blir brukte til sausen er såkalla vekksorterte tomater. Det betyr at dei hadde blitt kasta om ikkje Ryfylke Smak hadde nytta dei til saus. Så dette er ressursutnytting på beste vis. Sausen kan du smaka og kjøpa på standen til Ryfylke Smak på Tomatfestivalen. Gled deg!