Hesby Sokneråd slår på stortromma når dei innbyr til kyrkjekonsert laurdag 7. august. Gospelkoret Voice of Joy frå Nord-Rogland byr på friske songar og klar bodskap.
- Jo, me seier gospelkor. Men me er ikkje så bundne av sjangeren. Her er alt frå gospel til kjende bedehussalmar, fortel dirigent og primus motor Petter Losnegård.

Voice of Joy oppstod som ein følgje av eit rikt kormiljø på Karmøy midt på 90-talet. Nå er koret gått frå å vera prosjektkor med eit par øvingshelgar i året, til halvprofft med øvingar kvar veke og 50 konsertar i året.

- Me har opptaksprøvar for dei som vil vera med. Men det er ikkje noko Idol-greier, ler Petter Losnegård, som nå tar med seg vel 20 songarar og musikarar til Hesby kyrkje på Finnøy.
- Koret ser verkeleg fram til konserten. Nå har me hatt sommarferie, og gler oss til å koma i gong igjen. Då er det kjekt å starta i den flotte middelalderkyrkja på Hesby, avsluttar Losnegård.

Somme meiner Voice of Joy er det beste kristenkoret i Rogaland, ja på vestlandet. Du får sjølv vurdera laurdag 7. august. Konserten startar kl 20, kostar 200 kroner per person. Billettsal er i døra.